Tuesday, 24th April 2018

Balochi Academy

Home Site Map Feedback Contact us

urdu-logo


بلوچی اکیڈمی ءِ نیمگ ءَ چہ شعبہ بلوچستان جامعہ بلوچستان ءِ وش اتکی مراگش

3ستمبر 2016ءَ بلوچی اکیڈمی ءِ نیمگ ءَ شعبہ بلوچی ءِ سال اول ءُ دومی سال ءِ نودربرانی وش اتک ءَ یک مراگش ئے بندوبوج کنگ بوت۔اے دیوان ءِ جار چین بلوچی اکیڈمی ءِ جنرل سیکریٹری واجہ شکور زاہد اَت۔وھدیکہ اسٹیج ءِ سرا اکیڈمی ءِ کماش ممتازیوسف،نائب کماش واجہ سنگت رفیق،شعبہ بلوچی ءِ استاد بانک نسرین گل،پناہ بلوچ ہم نندوک اتنت۔
درستاں چہ پیش جارچین ءِ نیمگ ءَ واجہ پناہ بلوچ ءَ را توار پرجنگ بوت،کہ آ بئیت وتی تران ءَ بکنت۔واجہ ءَ گشت کہ شعبہ بلوچی ءُ بلوچی اکیڈمی ءِ نزیکیں سیادی ئے است ،بلوچی اکیڈمی ءَ کہ انوگیں دورءَ ہرچ کار ئے کرتگ یا کنگ ءَ انت ،شعبہ بلوچی ءِ اُستادءُ نودربرانی کمک آئی ءَ گون انت۔
بلوچی اکیڈمی کہ داں انوگ ءَ چارصدکتاب ءَ گیش چھاپ ءُ شنگ کرتگ نوں اے کاراں دیما برگ ءِ بار واجہ ءَ نودربرانی بڑءَ داتءُ آئی ءَ دزبندی کرتگ کہ شما نوں وتی پٹ ءُ پول ءَ برجا بہ داریت،بلوچی اکیڈمی شمئے کمکار انت۔
واجہ پناہ بلوچ ءَ رند جارچین ءَ شعبہ بلوچی ءِ دومی سال ءِ نودربر عظیم بلوچءَ گوانک جت عظیم بلوچ ءَ اکیڈمی ءِ پاگواجہ ءُ کارئندہانی منت گران ءَ آئی ءَ ادارگ آنی سرا چمشانکے دور دات کہ ءُ آھانی ارزشت ءِ سرا تران کرت۔آئی ءَ رند بلوچی اکیڈمی ءِ ساڑا کنان ءَ گشت کہ انوگیں دور ءَ پہ بلوچی زبان ءُ لبزانک ءِ دیمروئی ءَ بلوچی اکیڈمی ءِ کرد چہ درائیں ادارگاں دیما انت۔آئی امیت درشان کرت کہ اکیڈمی ہمے رنگ ءَ وتی کرد گیش محکم کنت۔بلوچی اکیڈمی ءِ نودربرانی کمک کنگ ءِ سرا آئی ءَ اکیڈمی ءِ کارئندہ آنی منت گپت۔عظیم بلوچ ءَ رند شعبہ بلوچی ءِ نودربر نسیم بلوچ ءَ را توار جنگ بوت،آئی ءَ اکیڈمی ءِ کارئندہءُ شعبہ بلوچی ءِ اُستادانی منت گپت ءُ گشت کہ اکیڈمی پہ نودربراں مدام یک اوست ئے رنگ ءَ برجم انت۔آئی ءَ گشت کہ اکیڈمی ایوکا چارصد کتابانی چھاپ ءُ شنگ کنگ ءِ نام نہ اِنت۔بلکیں آراج ءِ پجار انت۔ءُ راج ءُ زبان ءِ مڈیانی نام انت بلکیں راج ءُ زبان ءِ زندگ دارگ ءِ فرض آئی ءِ کوپگان انت۔آئی ءَ وتی تران ءِ گڈ سرا اکیڈمی ءِ کماش ءَ چہ دزبندی کت کہ ا ے رنگیں مراگش مدام برجم دارگ بہ بنت۔چہ آئی ءَ رند جارچین ءَ اکیڈمی ءِ نائب کماش سنگت رفیق ءَ را گوانک جت آئی ءَ وتی تران ءِ بندات گوں وتییک شئرے ءَ کت ۔آئی ءَ گشت کہ اکیڈمی ءُ شعبہ بلوچی ءِ کارءُ کرداں چُشیں تپاوتے نیست۔بلوچ راجدپتر ءَ پہازگ ءِ نام بلوچی اکیڈمی انت۔اگاں کسے لبزانک ءِ کجام تک ئے ءَ کارکنگ لوٹیت،بلوچی اکیڈمی ءِ دروازگ پہ آئی ءَ پچ انت۔شعبہ بلوچی ءِ نودربراں کہ ہمک سال یک مراگش ئے دئیگ بیت۔من سدکاں اے مراگش پہ نودربراں یک جزم ئے بیت۔آئی ءَ گشت کہ انوگیں کابینہ ءَ اے شور ٹہینتگ کہ نودربرانی پٹ ءُ پولاں کتابی دروشم دنت ءُ آھاں مالی کمک ہم کنت۔ءُ اے بابت ءَ گوں یونیورسٹیانی کماشاں منگ نامہ بوتگ۔آئی ءَ گشت کہ اکیڈمی ایوکا باسک آنی نہ انت ۔بلکیں ہرزبان ءُ لبزانک دوستانی انت۔اے رندءَ آئی ءَ اے شور ہم ٹہنتگ کہ آبلوچی ءُ بلوچستان ءِ درائیں ادارگاں کمک کنت۔آئی ءَ وتی تران ءِ گڈسراکماش ءِ نیمگ ءَ چہ اکیڈمی ءِ نیمگ ءَ جمکتگیں درائیں ربیدگی مڈی آں شعبہ بلوچی ءَ بخشائگ بوت۔سنگت رفیق ءَ چہ رند گل خان نصیر چیئرءِ سروک بانک نصرین گل ءَ را توار پرجنگ بوت،آئی ءَ درستاں پیش نوکیں کابینہ ءَ را مرادبادی دات ءُ چہ آھاں جوانیں کارکنگ ءِ امیت درشان کرت ءُ بلوچی اکیڈمی ءِ کتابانیارزشت ءِ سرا گپ جت۔آئی ءَ رند دیوان ءِ پاگواجہ ءُ اکیڈمی ءِ کماش ممتاز یوسف ءَ ر اتوار پرجنگ بوت آئی ءَ وت تران ءَ را گونڈ گران ءَ گشت کہ اکیڈمی شعبہ بلوچی ءِ نودربراں ءُ ایندگہ لبزانت ہرچ وھد ءَ کمک کنت ءُ آھانی کتگیں کاراں کتابی دروشم دنت۔چہ ایشی ءَ رند جار چین ءَ دیوان ءِ جارجت۔مراگش ءَ رند شعبہ بلوچی ءِ استاد نسرین گل ءُ نودربراں کتابانی ٹیکی دئیگ بوت۔

News & Updates



  

Newsletter Subscriber

Name:
Email:

Contact Info

Address: Adalat Road, Quetta, Pakistan

Phone No:  +92-81-2829566
Email: This email address is being protected from spambots. You need JavaScript enabled to view it.