پاکستان ءِ اکیڈمی ادبیات پاکستان ءِ قومانی زبانانی: بلوچی، پشتو، سندھی، پنجابی ءِ ترقی ءُ دیمروی کاراں گلائیش انت۔ ادبیات اے زباناں کتاب ہم چھاپ کنت۔ اے زبانانی نوشتہ بوتگیں کتاباں دومی ز باناں رجانک کنت۔ ادبیات اے زبانانی ادارہاں مالی مدت ءُ کمک کنت ءُ اے زبانانی شاعر، نوشتہ کار ءُ لبززانتاں ءَ مالی کمک کنت۔ پرے مقصد ءَاکیڈمی ادبیات ءِ یک اسکالرشپ کمیٹی یے است۔ادبیات شاعر ءُ ادیباںایوارڈہم دنت۔ادبیات ءِ بورڈ آف گورنر ے ہم است۔

            بلوچی اکیڈمی بلوچی زبان ءُ لبزانک ءِ قومی ادارہ یے بلے اکیڈمی ادبیات ءِ اسکالرشپ کمیٹی ءَ یا بورڈ آف گورنر ءَ بلوچی اکیڈمی ءِ نمائندگی نیست۔ ادبیات ءِ بورڈ آف گورنر ءَ پہ بلوچستان ءِ نمائندگی ءَ بایدانت چہ بلوچی اکیڈمی ءَجُست گرگ بہ بیت۔ہمے پیم ءَ بلوچی زبان ءُ لبزانک ءِ سرا نوشتہ بوتگیں کتابانی ایوارڈ دیگ ءَ ہم بائد انت کہ بلوچی اکیڈمی جست گرگ بہ بیت۔ اکیڈمی ادبیات ہما مردماں مالی مدت کنگ ءَ انت کہ آہانی جاہ ءَ بائد انت اے کمک حقدارتریں ادیب ءُ شاعر ءُ لبزانتاں دیگ بہ بیت۔پمیشا بائدانت کہ اسکالر شپ کمیٹی ءَ اکیڈمی ءِ نمائندگی بہ بیت۔ چہ ادبیاتءِ نیمگ ءَ پہ بلوچی اکیڈمی ءَ مقرر کتگیں سالانہ گرانٹ سک کم انت۔ اکیڈمی گوں اکیڈمی ادبیات ءِ واکداراں دست بندی کنت کہ آ بلوچی اکیڈمی ءِ سالانہ گرانٹ ءَ بہ ودین انت۔

بلوچستان ءِ اسکول ،کالج ءُ یونیورسٹیاں بلوچی وانینگ بیت بلے پہ وانگ ءُ وانینگ ءَ تنی وہدی شریں ءُ دل سریں نصاب یا کورس جوڑ نہ بوتگ۔حکومت بلوچستان ءِ ٹیکسٹ بک بورڈ پہ بلوچ زہگاںہنچیں نصاب جوڑ کنت کہ آنامعیاری انت ءُ نا زبان ءُ بیان ءَ شر ءُ واناک انت۔ بلوچی بلوچستان ءِ پراہ ءُ شاہیگانیں دمگاں ءُ سندھ ءُ پنجاب ءِ بلوچ دمگاں ءُ ایران ءُ اوگانستان ءِ بلوچ علاقہاں لہجہی کسانیں تفاوت ءُ پرک ئے داریت بلے اے نصابانی جوڑ کنوک چرے حقیقت ءَ پوہ نہ انت۔اے ادارگ پہ نصابءِ جوڑ کنگ ءَ ہنچیں مردماں کار بندانت کہ آبلوچی زبان ءُ لبزانک،بلوچ ءِتاریخ،معاشرت ءُ دود ءُ ربیدگاں ناسہی انت۔ پمیشا نااسکولانی نصاب ءُ ناکالج ءُ یونیورسٹیانی نصاب معیاری انت۔ بلوچی اکیڈمی گوں حکومتی واکداراں دست بندی کنت کہ پہ بلوچی ءِ نصاب ءِ جوڑ کنگ ءَ اکیڈمی ءَ را نمائندگی بہ دنت تاںکہ پہ بلوچ طالباں شریں، معیاری ءُ دل سریںنصاب ئے بے جوڑ کنگ ءَ بلوچی اکیڈمی بلوچستان ٹیکسٹ بک بورڈ ءَ راعلمی مدت دات بہ کنت۔

             بلوچی اکیڈمی اے لوٹ کنت کہ بلوچستان یونیورسٹی کوئٹہ ءُ تربت یونیورسٹی ءِ بلوچی ڈیپارٹمنٹس پہ کالج ءُ یونیورسٹی ءِ بلوچی ءِ وانوکاں جوانیں ءُ دل سریںنصابے جوڑ بکن انت۔ بلوچی اکیڈمی گوں اے دوئیں یونیورسٹیانی وائس چانسلران دست بندی کنت کہ وانندگ ءُ زانندگیں مردمانی کمیٹی ے مقرر بہ کنت تاںکہ آپہ یونیورسٹی ءُ کالجاں بلوچی ءِ شریں نصابے اڈبہ دئینت ءُبلوچی اکیڈمی ءَ اے کمیٹی ءَ نمائندگی دیگ بہ بیت تاںکہ اکیڈمی معیاری نصاب ءِ جوڑ کنگ ءَ یونیورسٹیانی علمی مدت ءَ بہ کنت۔

قرارداد

            بلوچی اکیڈمی لوٹ کنت کہ تربت یونیورسٹی ءُ بلوچستان یونیورسٹی کوئٹہ بلوچی ءَ ایم فل ءُ پی ایچ ڈی ءِ طالبان ءَ ہنچیں موضوع ءُ سرحالاں پٹ ءُ پول بہ پرمائیت کہ آ علمی ءُ ادبی معیار ءَ بیا اَنت۔بائد انت کہ سطحی موضوع ایم فل ءُ پی ایچ ڈی ءِ طالبانءَ دیگ مہ بیت۔ لہتیں سال ساری بلوچی اکیڈمی ءَ لہتیں علمی،تاریخی، سیاسی، معاشرتی ءُ لبزانکی موضوع دوئیں  یونیورسٹیانی وائس چانسلر اں ءَ رواں داتگ ءُ گوٛشتگ ات کہ اے ادارہانی بلوچی ڈیپارٹمنٹ ہمے یا ہمے وڑیں موضوع ءُ سرحال پہ ریسرچ ءُ پٹ ءُ پول ءَ طالباں ءَ بہ دیینت۔

            بلوچی اکیڈمی گوں اے دوئیں یونیورسٹیانی وائس چانسلراںدست بندی کنت کہ آبلوچی ڈیپارٹمنٹ ءِ واکداراں ہدایت بہ کن انت کہ آ بلوچی ءِ طالباںءَ پہ ایم فل ءُ پی ایچ ڈی ءِ ڈگریانی حاتراپہ پٹ ءُ پول ءَ شریں علمی ءُلبزانکی موضوع بہ دیینت۔

بلوچی اکیڈمی ءِ پنجاہءُ ہشتمی دیوان

کوئٹہ ( پ ر) بلوچی اکیڈمی ءِ پنجاہءُ ہشتمی دیوان چیئرمین ممتاز یوسف ءِ پاگواجہی ءَ ماں5اگست 2018ءَ جم دارگ بُوت۔دیوان ءَ کارگشاد شکور زاہد ءَ سالینہ کارکردگی رپورٹ پیش کت۔ رپورٹ ءَ نوکیں کتابانی چاپ ءُ شنگ، ادبی مراگش، مالی ہرچ ءُ درچ ، انسائیکلو پیڈیا پروجیکٹ ءِ سرا زُرتگیں گامگیج، بلوچی انگلش ڈکشنری ءِ سرا کار کنگ، بلوچی بنگیجی ءَ بہ گر تاں دہمی جماعت ءَ کورس ءِ اڑ کنگ، ایم فل ءُ پی ایچ ڈی سکالرشپس، بلوچی املا ءُ ایندگہ کار ءُ کردانی باروا زرتگیں گامگیجانی باروا دیوان ءَ را سرپدی دئیگ بوت۔ دیوان ءَ اے قرار داد وانگ بوتگ۔

قرارداد 1۔ بژنی حبرے کہ اکادمی ادیبات پاکستان، نیشنل لینگویج پروموشن ڈیپارٹمنٹ (ادارہ ِ فروغ قومی زبان)، نیشنل بک فائونڈیشن و دگہ وفاقی لبزانکی ادرہانی سروک مدام چہ یکّ صوبہ، دمگ ءُ زبان ءَ تعلقداریں لبزانکار ، پٹ ءُ پولکار ءُ زانت کاران ءَ نامینگ بنت کہ آئی ءِ سوب ءَ کسانیں صوبہ ءُ پاکستان ءِ دگہ زبانانی لبزانکارانی تہا تکانسری ودی بُوئگ ءَ انت، چہ بلوچستان ءَ نامینگ نہ بُوئگ ءَ انت۔ اے لوٹ کنت کہ اے ادارہانی سروک نامینگ ءِ وہد ءَ دراہیں صوبہ ءُ زبانان ءَ بروبریں موہ دئیگ بہ بنت۔

قرارداد 2۔ بلوچی اکیڈمی ءِ اے دیوان بلوچستان ءَ آچار قدیمہ ءِ دمب ءُ راجی مڈّی ءُ نشانانی چہ سرکار ءِ نیمگ ءَ نہ پہازگ ءَ ایر جنت ءُ لوٹ کنت کہ بنجاہی ءُ صوبائی سرکار اے راجی مڈی آنی پہازگ ءِ بند ءُ بست بہ کنت۔ ہمے وڑ ءَ بلوچستان میوزیم ءَ را دوار بنا بہ کنت۔ ماں مہر گڑھ ءَ میاں استمانی بستار ءَ میوزیم ءُ ریسرچ سینٹرے جوڑ کنگ بہ بیت۔

قرار 3۔ بلوچی اکیڈمی ءِ دیوان چہ سرکار ءَ لوٹ کنت کہ آ سکول ءُ وانگ جاہاں استیں نصاب ءَ مٹّ بہ کنت ءُ نوکیں نصاب ءِ تہا بلوچانی راجدپتر ، زبان ءُ دودمان(ثقافت) ءِ جوانی ءَ شون بہ دنت۔ بلوچی اکیڈمی ءِ دیوان اے لوٹ ءَ ہم کنت کہ بلوچستان ٹیکسٹ بک بورڈنصاب ءِ ٹاہینگ ءَ بلوچی اکیڈمی ءَ را نمائندگی بہ دنت۔

قرارداد 4۔ اکیڈمی چہ سرکار ءَ لوٹ کنت کہ اسکول ءُ کالجاں بلوچی وانینگ بہ بیت ءُ بلوچستان ءِ سرکار پہ بلوچی ءِ وانینگ ءَ ہما ورناہاں بہ داریت کہ آہاں چہ یونیورسٹیاں ماسٹرز ءِ ڈگری گپتگ یا ہماہاں بی اے یا بی ایس سی ءَ ونتگ ءُ پاس کتگ۔