Press Release

اکیڈمی ءِ سالینہ دیوان ءُ گچین کاری

بلوچی اکیڈمی کوئٹہ ءِ گچین کاریانی ردا عبدالواحد بندیگ بلوچی اکیڈمی چیئرمین گچین کنگ بوتگ۔ ایندگہ اگدہ دارانی تہا ممتاز یوسف وائس چیئرمین ، محمد پناہ بلوچ  جنرل سیکریٹری ءُ ہیبتان عمر جوائنٹ سیکریٹری گچین کنگ بوت انت۔

ہمے درچ ءَ عبداﷲبلوچ ، صدیق بلوچ، ڈاکٹر کہور خان، کمبر دشتی، نصیر داد اﷲ، حامد علی بلوچ ءُ سنگت رفیق بند ءُ بوجی (مجلس منتظمہ ) ءِ باسک گچین کنگ بوت انت۔ بلوچی اکیڈمی کوئٹہ ءِ اے گچین کاری نامداریں کانود زانت ظہور احمد شاہوانی ءِ چیر دستی ءَ برجم دارگ بوتگ انت۔ گچین کاریاں ساری اکیڈمی ءِ لس مجلس(مجلس عمومی)ءِ دیوان اکیڈمی ءِ چیئرمین عبدالواحد بندیگ ءِ پاگواجہی ءَ برجم دارگ بوت۔ اکیڈمی جنرل سیکریٹری اثیر عبدالقادر شاہوانی ءَ اکیڈیمی سالی رپورٹ دیوان ءِ دیم ءَ پیش کت کہ آئی ءِ سرا باسکاں گپ ءُ تران ءَ پد تپاکی درشان کت۔ دیوان ءِ تہا بلوچی زبان ءُ ادب ءُ دود ربیدگی دیمروئی ءُ ایندگہ سرحالانی سرا شؤر ءُ صلاہ دیم ءَآرگ بوت انت۔ دیوان ءَ بلوچانی پہ زور آور جنگ ءُ پَل ءُ پَسیلانی احترام ءَ را پادمال کنگ ءَ ایر جنگ ءُ صوبائی ءُ وفاقی حکومت ءَ گوں لوٹ کنگ ءَ اے وڑیں ناروائی دارگ بہ بنت۔

ریڈیو پاکستان کوئٹہ ءِ بلوچی نشریات ءِ بندات کنگ بہ بیت

کوئٹہ :  بلوچی اکیڈمی ءِ بند ءُ بوجی مجلس ءَافسوزی درشان کنان ءَگشتگ کہ گوستگیں ہشت سالاں ریڈیو پاکستان کوئٹہ سینٹر ءِ شارٹ ویو ءُ چینل 2، کہ آئی ءِ سرا بلوچی راکش شنگ ءُ تالان بنت، حراب انت۔ بلے اے ہشتیں سالاں ریڈیو پاکستان صوبائی ءُ وفاقی سرکار ءِ نیمگ ءَ اے ساز ءُ سامان شَرّ کنگ ءِ حاترا ہچ وڑیں گامگیجے زورگ نہ بُوتگ۔ ایشی ءِ سوب ءَ درائیں بلوچستان ہوار دُگنیا ءِ ہچ جاہ ءَ بلوچی مراگش گوشدارگ بوت نہ بنت کہ گوں بلوچی زبان ءَ سکیں مزنین ناروائی یے۔ بند ءُ بوجی مجلس ءَ حکومت بلوچستان حال رسانی ءُ شنگ کاری ءِ وزیر رحیم زیارتوال ءَ ہوار صوبائی ءُ وفاقی حکومت ءَ لوٹ کتگ کہ ریڈیو پاکستان کوئٹہ سینٹر ءِ اے ازباب شَرّ کنگ بہ بنت تنکہ مردم چہ بلوچی مراگشاں زِبہر مہ بنت۔

بولان تھنک 2012ءِ شَرّ تریں کتاب نامینگ بوتگ

کوئٹہ : اکادمی ادبیات پاکستان ءِ نیمگ ءَ بلوچی اکیڈمی کوئٹہءِ شنگ بُوتگیں کتاب  ‘‘ بولان تھنک’’ ءَ را سال 2012ء شَرّ تریں کتاب نامینتگ ۔ ‘‘بولان تھنک’’ محمد پناہ بلوچ ءِ پولکاری کتابے۔ اکادمی ادبیات پاکستان ہمک سال اردو ، بلوچی ، سندھی ، پنجابی ، پشتو ، سرائیکی انگریزی کتاباں راجی داد (ایوارڈ) بخشائیت۔

 بلوچی لکھوڑ (رسم الخط) ءِ سرا سئے روچی ورکشاپ

کوئٹہ : بلوچی اکیڈمی کوئٹہ ءِ نیمَگ ءَ بلوچی لکھوڑ (رسم الخط) ءِ رہبنداں گیشّینگ ءِ حاطرا زانت کار ءُ  کوّاسانی یک سئے روچی مراگشے برجم دارگ بُوتگ۔ مراگش ءَ را بنگیج کنان ءَ اکیڈمی ءِ چیئرمین عبدالواحد بندیگ ءَ گشتگ کہ بیست ءُ یکمی کرن ءَ ایندگہ زباناں باز دیمروئی کتگ بلے بلوچی زبان ءَ گوں بازیں اڑ ءُ جنجالاں وتارا آجاہ ءَ سر کت نہ کتگ۔ اے مراگش بلوچی لکھوڑ ءَ گہتر کنگ ءُ سانئسی وڑ ءُ پیم ءَ رواج دئیگ ءِ یک کسانیں جُہدے۔ رسم الخط کمیٹی ءِ کار مستر واجہ اﷲبشک بزدار ءَ گشتگ کہ رسم الخط ہر زبان ءِ ہما بہر اِنت کہ چریشی ءَ ابید زبان وتارا یک رِد ءَ داشت نہ کنت ۔ مئے جہد ہمیش اِنت کہ بلوچی ءِ لہتیں انچیں سائنسی راہ بندے جوڑ بہ کن انت کہ دراہیں بلوچ وانوک ءُ زانت کارآئی ءِ سرا تپاک بہ بنت۔ اے ورکشاپ ءِ رپورٹ ءَ زوت شنگ کنگ بیت۔

اکیڈمی ءِ سالینہ دیوان 28ستمبر 2014ءَ برجم دارگ

کوئٹہ : بلوچی اکیڈمی کوئٹہ ءِ بند ءُ بوجی مجلس( مجلس منتظمہ) ءِدیوان ماں اکیڈمی ءِ کار گِس عدالت روڑ ءَ برجم دارگ بُوتگ۔ دیوان ءَ اے سوڈگ کُرتگ کہ لس مجلس (جنرل باڈی) ءِ دیوان کہ آئین ءِ رُو ءُ اَگست ءِ اولی ہپتگ ءَ لوٹارینگ ہژدری بُوتگ، بازیں سوباں ا ے دیوان 28ستمبر 2014 ءِ سہب ءِ 10 بج ءَ جم دارگ بیت۔ کلیں باسکاں گوں دست بندی اِنت کہ اے روچ ءَ گوشتگیں وہد ءُ پاساں وتارا ساڑی بہ کن اَنت۔